Баянгол дүүргийн цэцэрлэгүүд орчин үеийн STEAM сургалтын хэрэглэгдэхүүнтэй болсноор хиймэл оюунд суурилсан боловсролын шинэ шатанд шилжиж байна. Тус дүүргийн Засаг дарга Ө.Сумъяабаатар, орлогч Д.Мөнхбаатар нар 41 цэцэрлэгийн эрхлэгч нарт уг хэрэглэгдэхүүнийг гардуулан, албан ёсоор хүлээлгэн өглөө. Энэ нь хүүхдүүдийг бие даан сэтгэх, багаар ажиллах, бүтээлч байдлаа хөгжүүлэх, орчныг танин мэдэх чадамжтай болгох суурь орчныг бүрдүүлж байгаа юм.

2025 оны хичээлийн жилд Баянгол дүүрэг боловсролын салбар дахь хөрөнгө оруулалтаа эрчимжүүлж, нийслэлийн төсвийн хөрөнгөөр 12 цэцэрлэг, 9 сургуулийн дээвэр, цахилгааны системд засвар шинэчлэл хийхээр төлөвлөсөн байна. Мөн 14 цэцэрлэг, 6 сургуулийг аюулгүй байдлыг сайжруулах зорилгоор камержуулж, дагалдах тоног төхөөрөмжөөр хангах ажлыг хэрэгжүүлнэ.

Үүнээс гадна, дүүргийн өөрийн хөрөнгө оруулалтаар 20 цэцэрлэгт угаалгын машин, уурын индүү зэрэг шаардлагатай тоног төхөөрөмжийг нийлүүлж, цэцэрлэгийн үйл ажиллагааны чанарыг нэмэгдүүлнэ. Түүнчлэн гурван сургууль, зургаан цэцэрлэгийн дээвэр, дөрвөн сургууль, 14 цэцэрлэгийн цахилгааны сүлжээ, нэг сургууль, дөрвөн цэцэрлэгийн сантехникийн системд томоохон засвар хийхээр төлөвлөжээ.

Сургуулийн хүртээмжийг нэмэгдүүлэх хүрээнд дүүргийн 24-р хорооны нутаг дэвсгэрт байрлах “Алтай” болон “Голден парк” хотхонд тус бүр 960 хүүхдийн суудалтай хоёр шинэ сургуулийн барилгын ажлыг эхлүүлэх бэлтгэл хангагдаад байна. Энэ нь Баянгол дүүргийн сургалтын ачааллыг бууруулж, хүүхдүүдийн сурч хөгжих орчныг сайжруулахад бодит ахиц авчирна гэж дүүргийн удирдлагууд үзэж байна.