BlackPink хамтлагийн гишүүн Jennie Banana Kick амттаныг өөрийн хамгийн дуртай амттан хэмээн онцолсноор Nongshim компанийн хувьцааны ханш огцом өсчээ. Jennie Америкийн The Jennifer Hudson Show ток шоунд оролцохдоо тус амттаныг дурдаж, гадил жимсний амтыг онцолсноор Nongshim-ийн хувьцааны үнэлгээ дөрвөн өдрийн турш дараалан өсөж, компанийн зах зээлийн нийт үнэлгээ 264 тэрбум воноор нэмэгджээ.

Шинжээчид энэхүү өсөлтийг дэлхийн дахинаа алдаршиж байгаа Jennie-ийн шүтэн бишрэгчдийн нөлөө хэмээн үзэж байна. 

Nongshim-ийн маркетингийн баг уг боломжийг ашиглан Banana Kick болон Shrimp Crackers амттаныг үргэлжлүүлэн сурталчилж, тус брэндийн бүтээгдэхүүнүүд болох Whale Rice Crackers, Shrimp Chips зэрэг нь олон нийтийн сүлжээнд тренд болж эхэлсэн байна. 

1978 онд анх худалдаанд гарсан Banana Kick нь Солонгосын үндсэн амттаны нэг болж, гадилын амтыг хялбар, хямдхан мэдрэх боломжийг хэрэглэгчдэд олгожээ. Тухайн үед гадил жимс нь тансаг жимс гэж тооцогддог байсан тул Banana Kick нь түүнд маш сайн орлуулагч болсон байна. 

Үүнээс гадна Jennie-ийн бие даасан цомог болох "Ruby" олон улсын хөгжмийн ертөнцөд томоохон тэсрэлт хийж, АНУ-ын Apple Music-ийн "Top Album" жагсаалтад К-поп эмэгтэй уран бүтээлчдийн дунд анх удаа топ 10-т багтаж, 9 дүгээр байранд орсон байна.

Түүнчлэн түүний уран бүтээл Spotify-ийн "Daily Top Songs Global" чартад 7 дугаарт бичигдсэн бөгөөд Billboard Hot 100 чартад нэгэн зэрэг 3 дуу нь багтсан анхны К-поп эмэгтэй уран бүтээлч болжээ.