АНУ-ын хөрөнгийн биржид бүртгэлтэй зах зээлийн үнэлгээгээр тэргүүлэгч 500 компаниас бүрддэг S&P 500 индекст технологийн “Dell” болон “Palantir” компани нэгдэхээр болсныг “S&P Global” мэдэгдлээ. Уг мэдэгдэл гарснаар тус компаниудын хувьцааны ханш 7 гаруй хувиар өссөн үзүүлэлттэй байна.

Программ хангамж үйлдвэрлэгч “Palantir” компани нь “American Airlines”-ийн оронд орж байгаа бол “Dell” компани “Etsy”-г орлож байгаа аж. 

Компьютер, сервер үйлдвэрлэгч “Dell”-ийн хувьд 1996-2013 онд тус индекст багтаж байсан бөгөөд ийнхүү зах зээлийн үнэлгээгээр тэргүүлэгч 500 компанийн эгнээнд эргэн нэгдлээ.

“Dell” 2019 оноос хойш бараг улирал бүр ашигтай ажиллаж байгаа юм. Тус компанийн хувьцааны ханш 2019 онд 90 хувийн өсөлтийг үзүүлж байсан бол энэ жил 33 хувиар өсөөд буй.