Зэсийн ханш сүүлийн саруудад онцгой савлагаа үзүүлээгүй ч зах зээлд хэт их хүлээлт байгаагүй гэдгийг Швейцарын хөрөнгө оруулалтын томоохон банк Julius Baer дахин баталлаа. Тус банк зэсийн суурь нөхцөл байдлыг “зөөлөн” гэж тодорхойлж, нийлүүлэлт харьцангуй хангалттай хэвээр буйг сануулав. Энэ нь ирэх саруудад үнэ огцом өсөх боломж бага гэдгийг илэрхийлж байгаа юм.

Хятадын талаарх хүлээлт ч өөрчлөгдөөд байна. Өнгөрсөн онд тус улсын зэсийн импорт эрчимтэй өссөн ч энэ өсөлт удаан үргэлжлэхгүй хэмээн тус банк үзжээ. Ялангуяа Бээжин үл хөдлөхийн дуусаагүй төслүүдээ барьж дуусгахыг зорьж, экспортын өсөлтөө түр зуур дэмжсэн нь хэрэглээг богино хугацаанд хөөргөдсөн гол шалтгаан болсон байна. Үүн дээр нэмээд АНУ-ын талаас тавигдах шинэ тарифын өмнө компаниуд түүхий эдээ урьдчилан татсан нь нийлүүлэлтийг түр зуур өсгөсөн гэж дүгнэжээ.

Дэлхийн эдийн засгийн бусад томоохон бүсүүд ч нөхцөл байдалтай уялдан зэсийн эрэлтэд нөлөө үзүүлж байна. АНУ болон Европын холбоонд эдийн засгийн өсөлт саарсан нь дэд бүтцийн шинэ хөрөнгө оруулалтыг удаашруулж, үйлдвэрлэлийн хэмжээ ч анзаарагдахаар хумигджээ. Энэ нь зэсийн хэрэглээнд шууд сөрөг нөлөө үзүүлж, үнэ өсөх орон зайг хумьж байгаа юм.

Түүнчлэн дэлхийн хэмжээнд зэсийн олборлолт нэмэгдэж байгааг Julius Baer онцолжээ. Өмнөд Америк дахь шинэ уурхайнууд ашиглалтад орж, нийлүүлэлтийн дарамтыг улам бүр бууруулж байгаа аж. Тиймээс зэсийн зах зээл эрэлтээсээ илүүтэй нийлүүлэлтээр тэлж, үнийн өсөлтөд дарамт учруулах магадлал өндөр байгаа юм.

Ийм нөхцөлд зэсийн үнэ өнөөгийн түвшнээс хэт давж өсөхгүй, төвийн шугамаар буюу хүлээлтийн хүрээнд хэлбэлзэх төлөвтэйг банкны шинжээчид онцоллоо. Зэс бол дэлхийн үйлдвэрлэл, дэд бүтэц, эрчим хүчний салбарын гол түүхий эд хэдий ч, одоогоор зах зээл хангалттай нөөцтэй, эрэлт түр зуурын шинжтэй байна гэж тэд дүгнэжээ.