Z үеийнхэн хуучны технологийг дахин тренд болгож байна. Поларойд камер, винил пянз зэрэг бидний мартаж эхэлсэн зүйлсийг тэд дахин хэрэглэж, дэлгэцээс түр ч атугай хөндийрөн, бодит мэдрэмжийг илүү үнэлэх болжээ.

23 настай Лондон Глорфилд ухаалаг утас, компьютер зэрэгт хэт их цаг зарцуулах нь өөрийг нь залхааж, бухимдуулж байгааг анзаарчээ. Тэрбээр үе үе олон нийтийн сүлжээн дэх хаягаа устгаж, завсарлага авахыг оролддог байсан бөгөөд энэ нь түүнд “Kickback” хэмээх компаниа байгуулах сэдлийг өгсөн байна. Энэхүү компани нь CD тоглуулагч, пянз тоглуулагч, хуучны камер, кассет тоглуулагч зэрэг бүтээгдэхүүн борлуулдаг бөгөөд байгуулагдсан эхний жилдээ 500,000 ам.долларын орлого олжээ. Энэ нь Z үеийнхэн ухаалаг төхөөрөмжөөс түр ч болов салж, илүү энгийн, бодит хэрэглээг эрэлхийлэх болсны нэгэн жишээ юм.

Судлаачдын үзэж буйгаар энэ тренд нь зүгээр нэг дурсамжаа сэргээхээс илүүтэйгээр, бодит зүйлсийг мэдрэх хүний төрөлхийн хүсэлтэй холбоотой аж. Орчин үеийн технологи бидний амьдралыг хөнгөвчилсөн ч, бүх зүйлийг хэтэрхий хиймэл, механик болгожээ. Харин гартаа жинхэнэ камер барьж зураг авах, пянз тоглуулагчаар хөгжим сонсох, хуучны бичгийн машин ашиглах зэрэг нь илүү амьд, бодит мэдрэмжийг төрүүлдэг байна.

“Retrospekt” хэмээх ретро технологийн онлайн дэлгүүрийн үүсгэн байгуулагч Адам Фуэрст хүмүүс зөвхөн амар хялбар хэрэглээ гэлтгүй, утга учиртай, өвөрмөц мэдрэмжийг ч мөн эрэлхийлэх болсон талаар онцолжээ. Тус дэлгүүрт 35 мм-ийн камер, кассет тоглуулагч, Polaroid 600 камер, сэргээн засварласан iPod тэргүүтэй хуучны бүтээгдэхүүн зардаг аж. Түүний компани жилдээ 8 сая ам.долларын орлого олдог бөгөөд худалдан авагчдын ихэнх нь 13-39 насныхан байдаг хэмээв. Тэрбээр технологийн дэвшлийг үгүйсгэхгүй ч, бүх зүйлийг зөвхөн нэг төхөөрөмжид төвлөрүүлэх нь хүний төрөлх мөн чанарт харш гэж үздэг байна.

Дэлгэц бидний өдөр тутмын амьдралын салшгүй нэг хэсэг болохын хэрээр Z үеийнхэн үүний эсрэг зогсож, илүү бодит, үнэ цэнтэй санагдах зүйлсийг эргэн хэрэглэж эхэлжээ.