Монгол Улс 2023 онд түүхэндээ анх удаа 8.9 тэрбум ам.долларын үнэ бүхий 70 сая тонн нүүрс экспортолж дээд түвшинд хүрсэн. БНХАУ-ын Монгол Улсаас импортлох нүүрсний хэмжээ 2023 онд өмнөх оноос хоёр дахин нэмэгдэж, мөн л дээд хэмжээнд хүрсэн. Тэгвэл 2024 онд нүүрс тээврийн дэд бүтцийн хөгжил, БНХАУ-ын нүүрсний хэрэгцээнээс шалтгаалан дахин дээд амжилт тогтоох магадлалтай байна.

Монгол Улсын хувьд шинээр өргөтгөсөн нүүрс тээврийн авто зам нь нүүрс тээврийн эрчмийг нэмэгдүүлж 2024 онд БНХАУ-ын Монгол Улсаас авах нүүрсний хэмжээ өмнөх оныхоос 10 гаруй хувиар өсөх магадлалтай байна гэж Бээжинд төвтэй нүүрсний худалдааны албаныхан тооцоолжээ.

Түүнчлэн БНХАУ-ын нийт эрчим хүч үйлдвэрлэлийн 61 хувийг нүүрсний технологи бүрдүүлж байдаг нь Монголын хямд нүүрсний эрэлтийг улам нэмэгдүүлсэн гэж шинжээчид дүгнэжээ.

Монгол Улс БНХАУ-д нэг тонн нүүрсээ дунджаар 974 юань буюу 135.98 ам.доллароор экспортолсон нь ОХУ-ын нүүрснээс 20 хувиар, Австралийн нүүрснийхээс даруй хоёр дахин хямд гэсэн үг юм.