Монголбанк энэ оны гуравдугаар сард 281.8 кг үнэт металл худалдан авч, оны эхнээс өссөн дүнгээр 2.2 тонн үнэт металл худалдан аваад байна. Энэ нь өмнөх оны мөн үеийнхтэй харьцуулбал 35.1 хувиар багассан үзүүлэлт гэж төв банкнаас мэдээлэв. Дархан-Уул аймаг дахь Монголбанкны хэлтэс оны эхнээс өссөн дүнгээр 55.4 кг, Баянхонгор аймаг дахь хэлтэс 254.1 кг үнэт металл худалдан авчээ. Монголбанкны үнэт металл худалдан авах үнийг дэлхийн зах зээл дээрх үнээр тогтоодог бөгөөд өнгөрсөн сард алт худалдаж авах дундаж үнэ 333,309.34 төгрөг байв. 

Дональд Трампын тарифын бодлого, геополитикийн эрсдэлүүд зах зээлд нөлөөлж, алтны спот ханш өнөөдрийн байдлаар 3132.01 ам.доллар байна. Трампын засаг захиргаа өнөөдөр импортын автомашин, эд ангиудад 25 хувь, Хятадаас орж ирж буй бүх бараанд 10 хувийн нэмэлт татвар тавих шинэ төлөвлөгөөг зарлана. Д. Трамп дөрөвдүгээр сарын 2-ны өдрийг 'Liberation Day' буюу  "Чөлөөлөх өдөр" гэж нэрлээд буй.