АНУ-ын Ерөнхийлөгч Дональд Трамп дөрөвдүгээр сарын 2-ноос шинэ тарифын бодлогоо албан ёсоор хэрэгжүүлж, энэ өдрийг "Чөлөөлөх өдөр" хэмээн зарлалаа. Тэрбээр энэхүү шийдвэр нь АНУ-ын худалдааны тэнцвэрийг сайжруулж, дотоодын үйлдвэрлэлийг дэмжинэ гэж мэдэгдсэн ч дэлхийн зах зээлд хүчтэй доргилт үүсгээд байна. Гэхдээ тарифын хувь хэмжээ, ямар улс орнуудад хэрхэн нөлөөлөх талаарх тодорхой мэдээлэл хараахан ил болоогүй байгаа нь нөхцөл байдлыг улам бүр тодорхойгүй болгожээ.

Энэ бодлогын нөлөөллөө хамгийн их үзүүлж буй салбар бол автомашины үйлдвэрлэл. АНУ-д үйлдвэрлээгүй бүх автомашинд 25 хувийн тариф ногдуулахаар болсон нь “Toyota”, “Nissan” зэрэг Азийн тэргүүлэх автомашин үйлдвэрлэгчийн хувьцааны ханшийг огцом унагажээ. Ялангуяа АНУ-ын зах зээлээс хамааралтай Япон, Өмнөд Солонгосын компаниуд хамгийн их хохирол амсах төлөвтэй байна. Автомашин үйлдвэрлэгчид үйлдвэрээ АНУ руу шилжүүлэх нь олон жил шаардах өртөг өндөртэй ажил тул энэхүү татварын дарамтаас зайлсхийх боломж тун хомс аж.

Үүнээс гадна, дотоодын металл үйлдвэрлэлийг дэмжих зорилгоор ган, хөнгөнцагааны импортод мөн 25 хувийн татвар ногдуулжээ. Харин Хятадаас орж ирэх бараа бүтээгдэхүүнд 20 хувийн татвар ногдуулж, худалдааны тэнцвэргүй байдлыг бууруулахаар төлөвлөсөн байна. Мөн Канад, Мексикээс орж ирэх ихэнх бүтээгдэхүүнд 25 хувийн татвар ногдуулж эхэлсэн ч АНУ-Мексик-Канадын гэрээний хүрээнд зарим барааг дөрөвдүгээр сарын 2 хүртэл түр хугацаанд татвараас чөлөөлжээ.

Эдгээр тариф дэлхийн санхүүгийн зах зээлд тодорхойгүй байдал үүсгэж, хувьцааны ханш хэлбэлзэн, эдийн засгийн тогтвортой байдалд эрсдэл дагуулж байна. 

Мөн бараа бүтээгдэхүүний үнэ өсөх магадлалтай гэж эдийн засагчид анхааруулж буй. Түүнчлэн Азийн автомашин үйлдвэрлэгчдийн хувьцааны ханш огцом унаснаар хөрөнгө оруулагчдын дунд олон улсын худалдааны ирээдүйн талаар түгшүүр үүсжээ. Үүнтэй холбоотойгоор Канад зэрэг улс өөрсдийн эдийн засгийг хамгаалах үүднээс хариу арга хэмжээ авахаа мэдэгдсэн байна.

Олон шинжээч энэ тарифын бодлого нь худалдааны дайнд хүргэж, АНУ болон түүний худалдааны түнш орнуудад эдийн засгийн томоохон хохирол учруулж болзошгүйг анхааруулж байна. Тиймээс ойрын саруудад дэлхийн зах зээлд ямар өөрчлөлт гарахыг анхааралтай ажиглах шаардлага үүсээд байна.