OpenAI компанийн ChatGPT хэрэглэгчдэд Ghibli хэв маягийн зураг бүтээх функцийг танилцуулсан юм. Уг хэв маяг дэлхий дахинаа эрчийг авч, OpenAI-ийн серверүүдэд хэт их ачаалал үүссэний улмаас тус функцийг түр хугацаанд хязгаарлахад хүржээ.

Дэлхийд алдартай Японы анимэйшн студи болох Studio Ghibli-ийн гар аргаар зурж, бүтээсэн өвөрмөц хэв маягтай дүрслэлүүдийг хэрэглэгчид өөрсдийн зургаар бүтээж цахим орчинд түгээгээд буй. 

Харин уг нөлөөгөөр ChatGPT-ийн долоо хоногийн идэвхтэй хэрэглэгчдийн тоо энэ жил анх удаа 150 саяыг давжээ. "Сүүлийн нэг цагийн дотор бид нэг сая шинэ хэрэглэгч нэмсэн," гэж OpenAI-ийн гүйцэтгэх захирал Сэм Алтман X хуудаснаа бичсэн байна. 

ChatGPT-ийн хэрэглэгчдийн идэвхжил, апп таталт, дотоод худалдан авалтын орлого зэрэг нь түүхэн дээд хэмжээндээ хүрсэн гэж SensorTower мэдээлжээ. Дэлхийн ChatGPT-ийн апп таталт 11 хувиар, долоо хоногийн идэвхтэй хэрэглэгчдийн тоо 5 хувиар, дотоод худалдан авалтын орлого 6 хувиар тус тус өссөн байна.

Гэвч хэрэглээ огцом нэмэгдсэнээс болж ChatGPT сүүлийн өдрүүдэд доголдол, тасалдалтай байгаа талаар OpenAI мэдээлсэн юм. "Бид одоогоор тогтвортой байдалд оруулах гэж ажиллаж байгаа ч OpenAI-ийн шинэ хувилбарууд саатах, зарим функцүүд ажиллахгүй байх, үйлчилгээ удаашрах зэрэг асуудлууд түр хугацаанд үргэлжилж магадгүй" хэмээн тус компани дурдлаа.

Түүнчлэн энэхүү тренд нь зохиогчийн эрхийн асуудал дагуулаад байгаа юм. "Хиймэл оюун ухаанаар үүсгэсэн зургууд Studio Ghibli-ийн өвөрмөц урлагийн хэв маягийг дуурайсан тохиолдолд энэ нь хууль эрх зүйн хувьд тодорхойгүй асуудал болж хувирна. Зохиогчийн эрхийн хуулиар зөвхөн тодорхой илэрхийлэл хамгаалагддаг бөгөөд урлагийн хэв маяг өөрөө хамгаалагддаггүй" хэмээн Neal & McDevitt хуулийн фирмийн хамтрагч Эван Браун хэлжээ.