АНУ-ын Ерөнхийлөгч Дональд Трамп лхагва гарагт “TikTok” платформыг худалдаж авах боломжтой хөрөнгө оруулагчдын талаар зөвлөлдөх уулзалт хийхээр төлөвлөжээ. Хэрвээ тус платформыг АНУ-ын компанид амжилттай худалдаж чадвал, улсын хэмжээнд үйл ажиллагааг нь хориглох шийдвэрээс зайлсхийх боломжтой гэж үзэж байна.

Трамп өмнө нь “TikTok”-ийг хориглох тухай хуулийн хэрэгжилтийг 75 хоногоор хойшлуулж, дөрөвдүгээр сарын 5 хүртэл хугацаа олгосон юм.

“TikTok”-ийг худалдаж авах сонирхлоо “Oracle”, “Blackstone” зэрэг хөрөнгө оруулалтын томоохон компани илэрхийлсэн бөгөөд тэднээс гадна хэд хэдэн санал ч иржээ. Тухайлбал, тэрбумтан Фрэнк МакКуртын удирдсан бүлэг “ByteDance”-д 20 тэрбум ам.долларын санал тавьсан бол “Roblox”-ийн гүйцэтгэх захирлыг багтаасан өөр нэгэн хөрөнгө оруулалтын бүлэг 30 тэрбум ам.долларыг санал болгосон байна. Мөн хиймэл оюуны стартап “Perplexity AI”, технологийн аварга “Microsoft” компани ч энэхүү хэлцэлд оролцох сонирхлоо илэрхийлжээ.

Ерөнхийлөгч Трамп “TikTok”-ийг АНУ-д үйл ажиллагаагаа үргэлжлүүлэхийг хүсэж буйгаа илэрхийлсэн бөгөөд уг платформ нь залуу сонгогчдын дэмжлэгийг авахад чухал үүрэг гүйцэтгэсэн гэж үздэгээ онцолжээ.

Хэрэв дөрөвдүгээр сарын 5-наас өмнө хэлцэл хийгдэхгүй бол “TikTok”-ийг хориглох хууль хүчин төгөлдөр болох ч Трамп шаардлагатай гэж үзвэл уг хугацааг дахин сунгах боломжтой гэдгийг мэдэгдсэн байна.

“TikTok” болон түүний эзэмшигч “ByteDance” компани одоогоор “TikTok”-ийн Америк дахь бизнесийг худалдах эсэх талаар албан ёсны мэдэгдэл хийгээгүй байна.