Ядрах болон нойрмоглох хоёр нь тусдаа ойлголт юм. Нойрмоглох нь бие махбодид амралт шаардлагатайг илтгэдэг бол, ядаргаа нь ихэвчлэн эрч хүчгүй, сулбайсан мэдрэмжээс үүдэлтэй байдаг. Хангалттай унтаж байгаа ч үргэлж ядарч сэрээд байвал үүний цаана өөр шалтгаан нуугдаж байж мэднэ.

Сэтгэлзүйн байдал – Сэтгэл түгших, сэтгэл гутрах зэрэг сэтгэлзүйн асуудлууд нойргүйдэл үүсгэж, улмаар эрч хүчийг бууруулдаг. Өөрөөр хэлбэл, зөвхөн бие махбод төдийгүй оюун санаа ч ядаргаанд орох боломжтой.

Чанаргүй нойр – Хангалттай хугацаанд унтсан ч байнга сэрвэлзэх, хурхирах, амьсгал тасалдах зэрэг асуудал гүн нойр авахад сөргөөр нөлөөлдөг. Үүний улмаас өглөө сэрэхэд ядруу, эрч хүчгүй санагддаг аж.

Тогтмол бус нойрны дэглэм – Өдөр бүр унтах, сэрэх цагаа нэгээс дээш цагаар хойшлуулж, урагшлуулдаг хүмүүсийн биеийн хэмнэл алдагдаж, эрч хүчгүй болох магадлалтай. 

Дааврын өөрчлөлт – Эмэгтэйчүүдийн хувьд дааврын өөрчлөлт мөн нөлөөлж болно. Сарын тэмдгийн мөчлөг, цэвэршилтийн үе шатуудад эрч хүч буурах хандлагатай байдаг.

Эрч хүчээ нэмэгдүүлэхийн тулд юу хийх вэ?

Эхлээд нойрны дэглэмээ тогтворжуулах хэрэгтэй. Өөрт тохирсон хэмжээгээрээ тогтмол цагт унтаж, сэрдэг байх нь чухал. Заавал 8 цаг байх албагүй шүү дээ. Хангалттай амраад сэрдэг бол 7 цаг байсан ч болно. 

Унтахаасаа өмнө дэлгэцийн хэрэглээгээ багасгаж, гэрлээ бүдгэрүүлж, тайван орчныг бүрдүүлэх нь нойрны чанарыг сайжруулна. Мөн согтууруулах ундааны хэрэглээгээ багасгаж, нойроос сэргээхийн тулд хэт их кофеин хэрэглэхгүй байхыг зөвлөжээ. Түүнчлэн өдөрт дор хаяж 20 минут нарны гэрэлд гарах нь ч бас тустай аж.