АНУ-ын Ерөнхийлөгч Дональд Трамп Европын Холбооноос орж ирэх бараа, тэр дундаа автомашинд 25 хувийн гаалийн татвар ногдуулахаа мэдэгдлээ. Харин ЕХ энэ шийдвэрийг эсэргүүцэж, хэрэв хэрэгжвэл хатуу хариу арга хэмжээ авахаа мэдэгдсэн байна.

Мөн Трамп Мексик, Канадын импортын барааны татварыг гуравдугаар сарын 4-нөөс эхлэн нэмэхээр төлөвлөсөн ч хугацааг хойшлуулж магадгүй талаар дурдсан. Гэсэн ч албаны эх сурвалжийн мэдээлснээр, уг хугацаа хэвээр үлдэх бөгөөд Трамп тун удахгүй эдгээр улсын хилийн аюулгүй байдлыг үнэлэх аж.

Гаалийн татвар нэмэгдсэнээр хэрэглэгчдэд хамгийн их дарамт үүсэх эрсдэлтэй. Трамп үүнийг АНУ-ын үйлдвэрлэлийг дэмжих, бусад улсын худалдааны бодлогыг өөрчлөх арга гэж үзэж буй ч эсрэгээрээ инфляцыг өдөөж, бизнесүүдэд сөрөг нөлөө үзүүлнэ гэсэн болгоомжлол бий.

Германы худалдааны холбооны хувьд 25 хувийн гаалийн татвар эдийн засагт хүндрэл авчрах ч даван туулах боломжтой гэж мэдэгджээ. Герман автомашины олон үйлдвэрлэгч АНУ-д үйлдвэртэй тул шууд хохирохгүй ч нийлүүлэлтийн сүлжээ олон улсын хил давж байгаагаас шалтгаалан зардал нэмэгдэх төлөвтэй аж.