АНУ-ын Техас мужийн Аустин хотод Tesla-ийн роботаксинууд үйл ажиллагаагаа явуулж эхэлсэн. Тэгвэл Tesla-ийн жолоочгүй автомашинууд автозамын хөдөлгөөнд эрсдэлтэй, эмх замбараагүй оролцож буйг харуулсан бичлэгүүд нийгмийн сүлжээнд тархсан байна. Үүнтэй холбогдуулан АНУ-ын Үндэсний Хурдны Замын Аюулгүй Байдлын Захиргаа (NHTSA) Tesla компанитай холбоо барьжээ.

Tesla компани өнгөрсөн ням гарагт Аустин хотод анхны автономи жолоодлоготой такси үйлчилгээний туршилтаа эхлүүлсэн бөгөөд зөвхөн уригдсан хэрэглэгчдэд зориулсан хязгаарлагдмал үйлчилгээ байв. Сошиал сүлжээнд тавигдсан бичлэгүүдээс харахад, нэг роботакси эсрэг чиглэлд явж байсан бол өөр нэг нь замын хөдөлгөөний дунд гэнэт огцом тоормослож, замын хажуу талд зогсож байсан цагдаагийн автомашинд хэт мэдрэг хариу үзүүлсэн зэрэг олон ноцтой жишээ бүртгэгдсэн байна. 

Tesla-ийн Full Self-Driving (FSD) буюу бүрэн автономи жолоодлоготой системийн өмнөх хувилбар болох FSD Beta системтэй холбоотой олон ослын дараа NHTSA өмнө нь тусгай шалгалт эхлүүлсэн бөгөөд энэ ажиллагаа одоо ч үргэлжилж байгаа юм.

Уг туршилтын хүрээнд 20 орчим тээврийн хэрэгсэл зөвхөн цаг агаарын таатай нөхцөлд, өдрийн цагаар, мөн урд суудалд хүний хяналт бүхий операторын хамт үйлчилж байжээ.

Харин БНХАУ-д Baidu-ийн Apollo Go, WeRide, Pony.ai зэрэг компани хэдийн арилжааны роботакси үйлчилгээ явуулж эхлээд байгаа юм.