Хүн бүр хөгшрөх хэрээр ой санамж нь муудаж буйд санаа зовдог. Хэдийгээр жижиг өөрчлөлтүүд хэвийн боловч хэт их доройтол нь дементиа буюу зөнөх эмгэг үүсгэх эрсдэлтэй. Энэ нь ой санамж, хэл яриа, сэтгэн бодох чадварыг сулруулж, өдөр тутмын энгийн үйлдэл хийхэд хүртэл хүндрэлтэй болгодог эмгэг юм.

Дементиа өвчнөөс бүрэн сэргийлэх боломжгүй ч судалгаагаар амьдралын хэв маяг, хооллолтдоо тодорхой өөрчлөлт хийснээр уг эрсдэлийг бууруулах болон өвчний эхлэх хугацааг удаашруулах боломжтой болох нь батлагджээ.

Мэдрэлийн эмч нар тархины үйл ажиллагааг дэмжих эерэг зуршлуудыг өдөр тутмын амьдралдаа хэвшүүлэхийг зөвлөдөг. Энэ нь хүн бүрийн онцлогоос хамааран архины хэрэглээгээ багасгах, тамхинаас гарах, тогтмол алхах, эсвэл хэт боловсруулсан хүнсний хэрэглээг багасгах гэх мэт ялгаатай байж болно. Тэгвэл тархийг эрүүл, хурц байлгахад хамгийн үр дүнтэй гэж мэдрэлийн эмч нарын үздэг гурван дадал зуршлыг танилцуулж байна.

Өглөөг эрүүл хоолоор эхлүүлэх

Өглөө бүр олон үрийн талх, тараг, самар, жимс зэрэг шим тэжээлтэй хоол хүнс хэрэглэх нь өдрийн турш эрч хүчтэй байхад төдийгүй тархины үйл ажиллагааг дэмжих давуу талтай аж.

Олон үрийн талх нь эслэгээр баялаг тул хоол боловсруулах үйл явцыг дэмжинэ. Тараг нь пробиотик агуулсан учир гэдэсний бичил орчныг сайжруулж, тархины үйл ажиллагаанд эерэг нөлөө үзүүлнэ. Самар, жимс нь антиоксидант, амин дэмээр баялаг тул ой тогтоолтыг дэмжиж, тархины хөгшрөлтийг удаашруулна. Өндөг нь уургаар баялаг бөгөөд тогтмол хэрэглэснээр дементиа үүсэх эрсдэлийг бууруулдаг болох нь судалгаагаар батлагджээ.

Тиймээс өглөөний хоолондоо тархины эрүүл мэндэд тустай хүнс сонгож хэвших нь урт хугацааны турш оюун ухааныг хурц байлгахад тусалдаг байна.

Хэнээс ч санаа зоволгүйгээр бүжиглэх

Бүжиглэх нь зөвхөн биеийн хөдөлгөөн нэмэгдүүлээд зогсохгүй тархи, зүрхний үйл ажиллагааг идэвхжүүлж, ой тогтоолт, сэтгэн бодох чадвар, бүтээлч сэтгэлгээг хөгжүүлэх гайхалтай дасгал юм. Судалгаагаар усанд сэлэх, дугуй унах, шатаар өгсөх зэрэг олон төрлийн хөдөлгөөнөөс зөвхөн бүжиглэх нь л дементиа үүсэх эрсдэлийг бууруулахад нөлөөлдөг болох нь тогтоогджээ.

Хэн ч төгс бүжиглэх албагүй. Зүгээр л дуртай дуундаа өөрийнхөөрөө хөдөлж, бүжиглэхэд л хангалттай.

Сонирхуулахад, хэрэв бүжиглэх нь танд цоо шинэ зүйл бол энэ нь тархи, биеийг бүр ч их сорих давуу талтай. Тархи их ачаалал авах тусам танин мэдэхүйн чадвар сайжирч, хөгшрөлтөөс үүдэлтэй доройтол удааширдаг байна.

Шинэ хэл сурах

Шинэ хэл сурах нь тархины үйл ажиллагаанд олон давуу талыг бий болгодог.

Хоёр болон түүнээс олон гадаад хэлтэй хүмүүсийн анхаарал төвлөрөл, ой тогтоолт, сэтгэн бодох чадвар илүү сайн байдаг. Шинэ хэл сурах нь тархины бүтцийг өөрчилж, мэдрэлийн эсүүдийн холболтыг бэхжүүлдэг тул хөгшрөлтийн үед үүсэх сэтгэцийн өөрчлөлтөөс хамгаалдаг аж. Судалгаагаар олон гадаад хэлтэй хүмүүст дементиа өвчний шинж тэмдэг нь дундаж хугацаанаасаа дөрвөөс таван жилийн дараа илэрдэг нь тогтоогджээ.

Шинэ хэл сурахад олон арга бий. Аппликейшн ашиглах, подкаст сонсох, ном унших, эсвэл тухайн хэлээр ярьдаг хүнтэй харилцах зэргээр өөрт тохирсон арга барилаа олох нь чухал.

Эдгээр энгийн хэрнээ үр дүнтэй зуршлууд тархийг идэвхтэй, эрүүл байлгахад тусалдаг аж. Тиймээс өглөөг эрүүл хоолоор эхлүүлж, хэнээс ч санаа зоволгүй бүжиглэж, шинэ гадаад хэл сурахыг хичээгээрэй.