Улаанбаатар хотын төв номын сангийн дэргэд дэлхийн стандартад нийцсэн, техник тоног төхөөрөмжийн хувьд бүрэн орчин үеийн, үйлчилгээгээрээ бүх нийтийн хэрэгцээг хангах жишиг номын сан барих ажил албан ёсоор эхэллээ. Энэхүү бүтээн байгуулалт нь Бүгд Найрамдах Солонгос Улсын Соёлын яамны “Хилийн чанад дахь номын сан” хөтөлбөрийн хүрээнд хэрэгжиж буй юм.

Шинэ номын сан нь нийт 2500 ам метр талбайтай, дөрвөн давхар байх бөгөөд ирэх 2025 оны хоёрдугаар сард бүрэн ашиглалтад оруулахаар төлөвлөж байна. Барилгын гүйцэтгэгчид энэ оны арваннэгдүгээр сар гэхэд гадна угсралтыг дуусгаж, харин дотоод засал болон тоног төхөөрөмжийн суурилуулалтыг ирэх оны хоёрдугаар сарын 1-нд дуусгахаар зорьж буйг нийслэлээс мэдээллээ.

Шинээр баригдах энэхүү жишиг номын сангийн хамгийн онцлог нь зөвхөн уншлагын танхим бус, насны ангилалд тохируулсан олон төрлийн үйлчилгээтэй байх юм. Жишээлбэл, сургуулийн өмнөх насны хүүхдэд зориулсан тусгай булан, цахим мэдээллийн төв, зохиолч уншигчдын уулзалт, шинэ номын нээлт, кофе шоп, соёлын хөтөлбөрүүд зэрэг нь иргэдийн чөлөөт цагийг үр дүнтэй, мэдлэгтэй өнгөрүүлэх орчинг бүрдүүлэхээр төлөвлөгдсөн байна.

Үүний зэрэгцээ төслийн хүрээнд Монголын номын сангийн үйлчилгээний чанарыг олон улсын түвшинд хүргэх зорилготой сургалтууд ч эхэлсэн байна. Тодруулбал, тус номын сангийн ажилтнуудыг гурван үе шаттайгаар БНСУ-д тусгай сургалтад хамруулж, мэргэжлийн ур чадвар, шинэ арга зүй эзэмшүүлэх юм. Энэ нь ирээдүйд нийслэлийн номын сангуудын үйл ажиллагаанд мэдэгдэхүйц өөрчлөлт авчрах чухал алхам хэмээн салбарынхан онцолж байна.

Өнөөдөр Улаанбаатар хотын нийтийн төв номын сан нь 1980 оноос хойш үйл ажиллагаа явуулж байгаа бөгөөд таван дүүрэгт салбар номын сантай. Жилдээ 150-200 мянган уншигчид үйлчлүүлдэг энэхүү сүлжээ 500 мянга гаруй номын фондтойгоор иргэдийн соёл, боловсролын хэрэгцээг хангаж ирсэн. Ирэх жил ашиглалтад орох шинэ жишиг номын сан нь Улаанбаатар хотын соёл, боловсролын орон зайд томоохон болж буй бөгөөд залууст илүү хүртээмжтэй мэдлэгийн орчинг бүрдүүлэх хүлээлт өндөр байна.